ချစ်ဆိပ်သင့်ဝိညာဉ် …

( ၂၀၁၂ - ဇန်န၀ါရီလထုတ် ဂမ္ဘီရလောကမဂ္ဂဇင်းတွင် ဖော်ပြခြင်းခံရပြီး မြဝတီရုပ်မြင်သံကြား ဘဝကြေးမုံကဏ္ဍမှာ ဇာတ်လမ်းတို ရိုက်ကူးခဲ့သော ဝတ္ထုတိုတစ်ပုဒ်ဖြစ်ပါသည် ) 

 

 

; ; ; ; ; ; ; ; ; ; ; ; ; ; ; ; ; ; ; ; ;

 

 

အိပ်မက်လို့ဆိုရအောင်ကလည်း အိပ်မက်မဟုတ်မှန်း ကျွန်မ သိနေတယ် ။ ဒါပေမယ့် လက်ဆုပ်လက်ကိုင်ပြဖို့ကလည်း အကောင်အထည် မရှိ…။ ကျွန်မအဖြစ်က အရူးတစ်ယောက်နဲ့ မခြားတော့ပါဘူး ။ ကျွန်မရဲ့မောင့်အပေါ်မှာ သတိရတမ်းတစိတ် တွေပဲ လွန်ကဲနေလေရောလား…။

အို…မဖြစ်နိုင်ပါဘူး ။ ကျွန်မ သူ့ကို မုန်းတီးလွန်းလို့ စိတ်နာလွန်းလို့သာ ထားပစ်ခဲ့တာမဟုတ်လား ။ ဘာကြောင့် အခုမှ သတိရတမ်းတနေရမှာလဲ ။

သစ္စာမဲ့ကောက်ကျစ်ယုတ်မာသူတစ်ယောက်ကို စွဲလမ်းတွယ်တာနေရလောက်အောင်လည်း ကျွန်မ မရူးမိုက်သေးပါ  ဘူး ။ ဒါပေမယ့်လေ ကျွန်မစားပွဲပေါ်မှာ အခုချိန်ထိ ထားရှိဆဲဖြစ်တဲ့-မောင့်ဓါတ်ပုံကို ငေးစိုက်ကြည့်ရင်း ကျွန်မရဲ့မျက်ရည်တွေ ပင်လယ်ဝေနေခဲ့ရပြီ ။ ဒါတောင် နားထဲက မောင့်အသံတိုးတိုးသဲ့သဲ့ကို ကြားဖြစ်အောင် ကြားလိုက်ရသေး ။

   “ မောင် တောင်းပန်ပါတယ် ဖြူ ”… တဲ့လေ ။

; ; ; ; ; ; ;

 

ရှင်းသန့်မောင်ဟူသော-မောင်နှင့် ပန်းလဲ့ဖြူဆိုသော-ကျွန်မက တစ်ယောက်နှင့်တစ်ယောက် အလွန်ချစ်မြတ်နိုးကြပေ မယ့် နှစ်ကိုယ်တစ်စိတ် ချစ်သူမျိုးတော့ မဟုတ် ။

ကျွန်မက ပန်းလဲ့ဖြူဟူသည့် နာမည်လေးနှင့်မှ မလိုက်ဖက်အောင် ထက်ထက်မြက်မြက် ဆတ်ဆတ်ကြဲစိတ်ဓာတ် ။ ကျွန်မ၏မိသားစုတွင်လည်း အငယ်ဆုံးသမီးမို့ တစ်အိမ်သားလုံး၏ဦးစားပေးယုယမှုကို ခံယူကာ ဘယ်အရာကိုမဆို ကိုယ်ဖြစ်စေ ချင်သည့်အတိုင်းဖြစ်မှသာ ကျေနပ်ရောင့်ရဲတတ်သူ ။ အမြဲတမ်း အလိုမကျမှုတွေကို ရင်ဝယ်ပိုက်ကာ မောင့်အပေါ်မှာ နိုင့်ထက် စီးနင်းဆက်ဆံတတ်သူ…။

            မောင်ကတော့ ရှင်းသန့်မောင်ဆိုသည့်နာမည်လေးနှင့် လိုက်အောင် အမြဲတမ်း သန့်သန့်ရှင်းရှင်း ကြည်ကြည်လင်လင် မျက်နှာပိုင်ရှင် ။ အရာခပ်သိမ်း အကောင်းဘက်က ကြည့်မြင်ခံစားတတ်သူ ။

ကျွန်မ၏ခံယူချက်က ဘဝတွင် ငွေသာလျှင် အဓိက ။ ထို့ကြောင့်လည်း တက္ကသိုလ်ကျောင်းသူအရွယ်လေးဖြင့် ကျူရှင်guideလုပ်ကာ တစ်လ သိန်းဂဏန်းဝင်ငွေရအောင် စီးပွားရေးသောင်းကျန်းလျက်ရှိစဉ်တွင် မောင်ကတော့ ကျောင်း ကော်ရစ်တာတွင် ထိုင်ရင်း အလှပန်းပင်လေးများ၏ ရှင်သန်ဝင့်ကြွားမှု ၊ ကျောင်းသားကျောင်းသူများ၏ သွားလာလှုပ်ရှားမှုတို့ကို ငေးကြည့်ပြီး ကဗျာတွေ စာတွေ ဖွဲ့နွဲ့သည် ။

ကျွန်မနှင့်မောင်၏ရည်ရွယ်ချက်/ရည်မှန်းချက်တွေကလည်း ပြဒါးတစ်လမ်း သံတစ်လမ်း…။ သို့တိုင် ပြဿနာဟူသော အရာက ကျွန်မတို့ချစ်သူနှစ်ယောက်ကြားမှာ ပေါက်ဖွားမလာသေး…။ ကျွန်မမွေးနေ့ဖြစ်သည့် ဇန်နဝါရီ (၁၅)ရက်နေ့မတိုင်ခင် အထိပေါ့ ။

     ဇန်နဝါရီ(၁၅) ။

ထိုနေ့က နာရီကိုခဏခဏကြည့်ရင်း ကျွန်မ စိတ်စောနေမိသည် ။ နာရီက (၁၀)နာရီကို ညွှန်ပြရန် (၅)မိနစ်သာ ကျန်တော့သည် ။ မောင် ရောက်မလာသေး။ ကျွန်မ ရုပ်ရှင်ရုံရှေ့ထိုင်ခုံလေးတွင် ထိုင်ကာ မောင့်ကိုမျှော်ရင်း မောင်နှင့်ကျွန်မအကြောင်းကို ပြန်လည် တွေးတောကြည်နူးနေမိသည် ။

ကျွန်မက ဆတ်ဆတ်ကြဲ မာနခဲလေးဖြစ်သော်လည်း မောင်နှင့်ပတ်သက်လာလျှင် ကျွန်မ အတတ်နိုင်ဆုံး နားလည်ပေးခဲ့ သည် ။ ဥပမာ မောင် စာရေးသည်ကို ကျွန်မ မနှစ်သက်ပေမယ့် မတားမြစ်ဖူးခဲ့ ။

မောင်က အင်မတန် ရိုးအေးသူတစ်ယောက် ။ ဘယ်သောအခါမျှ ကျွန်မကို တီတီတာတာချွဲချွဲနွဲ့နွဲ့စကားတွေ မဆိုခဲ့ဖူး သလို ကျွန်မနှင့်မောင် ချိန်းဆိုတွေ့စဉ်တိုင်း မောင်က ကျွန်မလက်ဖဝါးလေးကို ခပ်ဖွဖွဆုပ်ကိုင်သည်မှအပ တစ်စုံတစ်ရာ အခွင့် အရေးယူဖို့ မကြိုးစားဖူးခဲ့…မတောင်းဆိုဖူးခဲ့ပေ ။

သို့ကြောင့်လည်း မောင့်အပေါ်ကို ကျွန်မ ပို၍ပင် ယုံကြည်ချစ်ခင်မိသည် ။ သို့ပေမယ့်…တစ်ခါတလေလည်း မောင်ဟာ ကျွန်မအပေါ်မှာ သွေးအေးနေပြီလားဟု မိန်းမသားပီပီ သံသယဝင်မိပြန်၏ ။

            ပြဿနာဆိုသည့်အရာက မောင်နှင့်ကျွန်မကြားကို လေပြေလေညင်းလေးကဲ့သို့ တိုးဝှေ့ဝင်ရောက်လာသည် ။ ထိုနေ့က ရုပ်ရှင်စတင်ချိန်ထက် မိနစ်(၂၀)ကျော်နောက်ကျပြီးမှ မောင် ရောက်လာခဲ့သည် ။ အမှန်ဆို စောစောစီးစီး ရောက်လာသင့်သည် ။ ဇန်နဝါရီ(၁၅)က ကျွန်မမွေးနေ့လေ ။ မောင် အလေးထားသင့်တာပေါ့ ။

နောက်ပြီး…၀တ်စားလာပုံကလည်း ထုံးစံအတိုင်း စုတ်တိစုတ်ဖွာပုံစံ ။ ကျွန်မ၏ဒေါသတရား/မာနများက အထွတ်အထိပ် သို့ တက်သွားခဲ့တာလည်း မဆန်း ။ မောင့်အပေါ် ဒေါသတကြီးအော်ငေါက်ပစ်လိုက်တော့သည် ။

   “ မောင်…ဘယ်လိုလုပ်လိုက်တာလဲ ။ ဒီနေ့ ဖြူ့ရဲ့မွေးနေ့လေ ။ မောင် နည်းနည်းလေးမှ အလေးမထားဘူးလား ။ ဒါ…

      မောင့်စိတ်ရင်းပဲလား ။”

ဟန်မဆောင်တတ်သော-ကျွန်မက လူရှေ့သူရှေ့မှာပဲ မောင့်ကို ဒေါသတကြီး အော်ဟစ်အပြစ်တင်ပြီး ရုပ်ရှင်ရုံထဲမှ ထွက်လာကာ တစ်ဖက်လမ်းသို့ ကူးသွားဖို့ ကြိုးစားလိုက်သည် ။

လူတွေက ကျွန်မတို့အတွဲကို တအံ့တသြငေးကြည့်နေကြပေမယ့် ကျွန်မ ဂရုမစိုက် ။ မောင့်အပေါ် ဒေါသထွက်သည့် စိတ်တို့သာ ကျွန်မတစ်ကိုယ်လုံး လွှမ်းမိုးကြီးစိုးနေပြီ ။ စိတ်တိုတိုဖြင့် လမ်းကူးမည်ဆိုခါမှ မီးပွိုင့်က တော်တော်နှင့် မစိမ်း… ကားတွေက ရှုပ်ယှက်ခတ်လို့ ။

မောင်က တစ်ဖက်လမ်းသို့ မကူးရန် ကျွန်မလက်တစ်ဖက်ကို ဆွဲရင်း တားမြစ်သည် ။ သူ့အပေါ် စိတ်တိုနေသည့်ကျွန်မ က ဘာကိုမျှ မမြင်…စိတ်ဆိုးမာန်ဆိုးဖြင့် တစ်ဖက်လမ်းသို့ ကူးသွားလိုက်သည် ။

    “ကျွီ…”

အို…မြတ်စွာဘုရား…။ ကျွန်မ ကားတိုက်ခံရတော့မလို့ပါလား ။

အရှိန်နှင့် မောင်းဝင်လာသောကားတစ်စီး ကျွန်မကို တိုက်မိမလိုဖြစ်သွားခဲ့စဉ် နောက်မှကပ်ပါလာသူ-မောင်က ကျွန်မ လက်မောင်းကို ဖျတ်ခနဲ ဆွဲယူလိုက်သည် ။ လိုက်ထရက်ကားထံမှ ဘရိတ်အုပ်သံ‘ကျွီခနဲ’က ကျွန်မနားထဲသို့ ကျယ်လောင် နက်ရှိုင်းစွာစူးဝင်လာခဲ့ပြီ ။

ဘရိတ်အုပ်လိုက်သည်မှန်သော်လည်း  စောစောက ကျွန်မ ရှိနေသောနေရာကို ကျော်လွန်ပါမှ ရပ်တန့်သွားခြင်းဖြစ်၏ ။

- အမလေး…! ကံကောင်းလို့ …

ကျွန်မ မောင့်ကို ထိတ်လန့်တကြား မော့ကြည့်လိုက်မိသည် ။

မောင်သာ နောက်ကနေ ကျွန်မကို မဆွဲလိုက်လျှင် ယခုလောက်ဆို ကျွန်မ၏ဒေါသစိတ်ကြောင့် ကျွန်မနှင့် ထိုက်တန် သည့်-ဘုံဘဝတစ်ခုခုသို့ ရောက်ရှိသွားလောက်ပြီ ။

ထိုနေ့က အသက်ဘေးမှ သီသီလေးလွတ်ခဲ့ရ၍ ကြောက်လန့်စိတ်ဝင်ကာ ဒေါသတရားများ လွင့်ပါးသွားခဲ့ပေမယ့် မောင့်အပေါ်မှာ ကျွန်မ မကျေမချမ်းဖြစ်နေဆဲ…။

    “ မောင် တောင်းပန်ပါတယ် ဖြူ…”

မောင်က ထိုဝါကျတစ်ကြောင်းကိုသာ အဖန်တလဲလဲပြောဆိုပြီး ဘာကိုမျှ ထပ်မေးမရတော့ ။

- မောင် ဘာ့ကြောင့် နောက်ကျရတာ…။ မောင် ဘယ်ကိစ္စလုပ်နေလို့ စောစော ရောက်မလာနိုင်တာ ။

စသဖြင့် အကြောင်းပြချက်လည်း မပေး ၊ ဖြေရှင်းချက်လည်း မပေး…။ ကျွန်မ မောင့်ကို နားလည်ရခက်စွာဖြင့် ခွင့်လွှတ်လိုက်ရ သည် ။

ထိုနေ့က နောက်ကျရသည့်အကြောင်းရင်းကို ကျွန်မ ဘယ်လောက်မေးမေး ၊ မောင်က ကျွန်မကို ပြောပြခြင်းမရှိ ။ တစ်စုံ တစ်ရာကို ထိမ်ချန်လျှို့ဝှက်ထားသည့်ဟန် ။ သို့ကြောင့်လည်း မောင်နှင့်ပတ်သက်ပြီး ကျွန်မရင်ထဲ သံသယတွေ ကြီးထွားလာခဲ့မိ ၏ ။

ထိုနေ့က မောင်ဟာ ကျွန်မထက် ဦးစားပေးရသူတစ်ယောက်ယောက်ဆီကို သွားနေရလို့များလား…ဒါမှမဟုတ် မောင် ဘာတွေများ ကျွန်မအပေါ်မှာ ဖုံးကွယ်ထားသလဲ…၊ ကျွန်မ မသိအောင် ဘာတွေလုပ်နေလဲ ။ အို…မောင်နှင့်ပတ်သက်သည့်-မသင်္ကာစိတ်က ကျွန်မကို တစ်ချိန်လုံး နှိပ်စက်နေပြီ ။ အတွေးများ၏လေးလံဖိစီးမှုကို တွန်းလှန်ဖယ်ရှားနိုင်ဖို့အတွက် အဖြေမှန် တစ်ခုကို ရှာဖွေကြည့်ရန် ကျွန်မ ဆုံးဖြတ်လိုက်သည် ။

     ဇန်နဝါရီ(၁၆) ။ ကျွန်မမွေးနေ့ပြီး နောက်နေ့ ။

ကျွန်မ ထိုကိစ္စနှင့်ပတ်သက်ပြီး မောင့်အပေါ်မှာ သံသယဝင်နေပါသည်ဆိုခါမှ မောင်က တစ်နေ့တစ်ခြား ထူးခြားလို့လာသည် ။ ကျွန်မနှင့်အတူ ရှိနေခိုက် မောင့်စိတ်တွေက တစ်စုံတစ်ခုကို တွေးတောနေသလိုမျိုး ငေးငိုင်တွေဝေနေတတ်သလို ကျွန်မက တီးခေါက်မေးမြန်းကြည့်လျှင်လည်း ဟိုလိုလိုသည်လိုလို-ဆင်ခြေမျိုးတွေ ပေးတတ်သည် ။ ဟုတ်နေပါပြီ…မောင့်မှာ ကျွန်မအပြင် နောက်တစ်ယောက် ရှိနေပါပြီ ။ ဟုတ်မှာပါ ။

မောင်ဟာ လူချောတစ်ယောက် ။ အသားက ထူးထူးခြားခြား ကြေးဝါရောင်တောက်နေပြီး ဆံပင်ခွေခွေလေးတွေက အမြဲလိုလို လေထဲမှာ ပျံဝဲနေတတ်ရာ မောင့်ကို ကြည့်လိုက်တိုင်း အီဂျစ်နတ်ဘုရားတစ်ပါးလို ခန့်ညားနေတတ်သူ ။

အဝတ်အစား ကပိုကယိုဝတ်ဆင်တတ်သည်ကို ကျွန်မက အပြစ်တင်နေပေမယ့် တကယ်တမ်းကျ မောင်က ရှေးဟောင်း ပစ္စည်းလိုလူ ။ အဝတ်အစားတောက်တောက်ပပထက် ခပ်နွမ်းနွမ်းအရောင်မွဲမွဲကမှ ပနံသင့်ပြီး လိုက်ဖက်နေတတ်သည် ။

ကျွန်မနှင့်မောင်က တကယ့်ကို တခြားစီ ။ အသားဖြူဖြူ ၊ မျက်ခုံးထူထူနှင့် ကျွန်မက မြန်မာဖြစ်လျက်သားနှင့် တရုတ်မ ဟု အခေါ်ခံနေရသူတစ်ယောက် ။ နောက်ပြီး ဝတ်လိုက်လျှင်လည်း အနီ ၊ အရဲ ၊ အဝါတောက်တောက် ၊ အပြာရင့်ရင့် ။ သည်လို အရောင်တွေကမှ ကျွန်မနှင့် သင့်တင့်သည်ပဲကိုး ။

မောင်နှင့်ကျွန်မကြား အရာအားလုံးကွာခြားနေသော်ငြား ရင်ခုန်သံချင်း ထပ်တူညီခဲ့သဖြင့် ချစ်သူတွေ ဖြစ်ခဲ့ကြခြင်းဖြစ် ရာ ယခုတော့ ထိုအချက်ပါ ကွဲပြားသွားခဲ့ပြီလား ။ ကျွန်မ မတွေးဝံ့တော့ ။ စိတ်မှန်းဖြင့်လည်း ရမ်းသမ်းမစွပ်စွဲချင်ပါ ။

မောင်ဟာ ကျွန်မအပေါ်မှာ အရာရာစေတနာထားတတ်သော ချစ်သူကောင်းတစ်ယောက်မို့ မဟုတ်ဘဲလည်း မယိုးစွပ် ရက် ။ သည်တော့ ပြတ်ပြတ်သားသားသိရှိအောင် စုံစမ်းမှဖြစ်တော့မည်မို့ ကျွန်မ “စုံထောက်”လုပ်ရတော့သည် ။

တစ်နေ့တာအတွက် နှစ်ယောက်သား နှုတ်ဆက်လမ်းခွဲပြီးနောက် ကျွန်မ မောင့်နောက်ကို လိုက်ချောင်းခဲ့သည် ။ မောင် က မောင်တို့ရပ်ကွက်ထိပ်ရှိ လူမနေသော-အိမ်အိုကြီးထဲသို့ တစ်ယောက်တည်း ဝင်ရောက်သွားသည်ကို ကျွန်မ ကားပေါ်မှ ထင်ထင်ရှားရှားမြင်တွေ့လိုက်ရသည် ။

အိမ်အိုကြီးသည် ညနေခင်းဆည်းဆာရောင်အောက်တွင် မည်းနက်ပြောင်လက်စွာ တည်ရှိနေပြီး အိမ်၏ပတ်ပတ်လည်မှ သစ်ပင်ချုံနွယ်တို့က ဝင်ရောက်လာသူကို ဝါးမျိုဖျက်ဆီးတော့မည့်အလား ရုန်းကြွလှုပ်ရမ်းနေကြသည် ။

ထိုအိမ်အိုကြီးသည် အင်္ဂလိပ်မင်းလက်ထက်က ဆောက်လုပ်ခဲ့သောဘိုတဲပုံစံမျိုးဖြစ်ပြီး ခန့်ညားကြီးမားလှသော်လည်း လူမနေသည်မှာ ကြာမြင့်ပြီဖြစ်၍ ခြံတံခါးသံပန်းများပင် သံချေးတက်လျက်ရှိပြီ ။ မောင်က ဘာအတွက်ကြောင့်များ ဒီအိမ်ကြီးထဲ ကို ဝင်ရောက်သွားရပါလိမ့် ။

သရဲအလွန်ခြောက်သည်ဟု နာမည်ကြီးနေသော ထိုအိမ်ကြီးအတွင်းသို့ မောင်တစ်ယောက်တည်း ဝင်ရောက်သွားသည့် အတွက် ကျွန်မ စိုးရိမ်ပူပန်မိသော်လည်း လူမနေတဲ့-အိမ်အိုကြီးထဲမှာ မောင်ဟာ တခြားမိန်းမတစ်ယောက်နဲ့ ချိန်းတွေ့ပျော်မြူးနေ သလားဟူသော သံသယအတွေးများကြောင့် ကျွန်မမှာ နေရာမှ မရွေ့ဝံ့ဘဲ အိမ်အိုကြီးကိုသာ စောင့်ကြည့်နေမိသည် ။

နေလုံးက တဖြည်းဖြည်း တိမ်မြုပ်ပျောက်ကွယ်သွားပြီဖြစ်ပေမယ့် ဆည်းဆာအလင်းရောင်သဲ့သဲ့ ကျန်ရှိနေသေးသော အချိန်တွင် အိမ်ကြီးအတွင်းမှ မောင် ပြန်ထွက်လာသည် ။

            မောင့်မျက်နှာမှာ ဝင်သွားခါစထက် ပို၍ဖျော့တော့နွမ်းလျနေသလို ကျွန်မ ခံစားလိုက်မိသည် ။ သည့်နောက်တော့ မောင်က နေအိမ်တည်ရှိရာလမ်းအတွင်းသို့ မောပန်းတုန်ရီနေသော-ခြေလှမ်းများဖြင့် ဖြည်းဖြည်းမှန်မှန် ပြန်သွားလေသည် ။

     ဇန်နဝါရီ(၁၇) ။ ကျွန်မမွေးနေ့ပြီး ဒုတိယနေ့…။

မောင်နှင့်ကျွန်မ ပန်းခြံတစ်ခုတွင် ချိန်းဆိုတွေ့ရင်း ကျွန်မရင်ထဲ၌ တအုံ့နွေးနွေးဖြစ်နေရသည့် မနေ့ကအကြောင်းကို မောင့်ထံမှာ ပွင့်ပွင့်လင်းလင်း မေးမိသည် ။ ကျွန်မ၏အမေးစကားကြောင့် မောင်က အထိတ်တလန့်ဖြစ်သွားပြီး…

    “ ဖြူ…ဖြူ…မောင့်နောက်ကို လိုက်ချောင်းတယ် ဟုတ်လား ။”

    “ ဟုတ်တယ် မောင် ။ မောင့်ခြေလှမ်းတွေ ပျက်နေတာကို ဖြူ သတိထားမိလို့ ခုလိုလိုက်ချောင်းခဲ့တာ ။ ထင်တဲ့အတိုင်းပဲ ။

      မောင်က အိမ်အိုကြီးထဲကို ဝင်သွားတယ်လေ ။ မောင် ဘာအတွက်ကြောင့် အဲဒီအိမ်စုတ်ကြီးထဲကို ဝင်သွားရတာလဲ ။

      ဖြူ့ကို ရှင်းပြပါ မောင် ။”

ကျွန်မအသံက ပြတ်ပြတ်သားသား တင်းတင်းမာမာ ။ အထောက်အထားခိုင်လုံနေပြီမို့ မောင် ရှင်းရတော့မယ်ဟု ကျွန်မ တွက် လိုက်မိပေမယ့် မောင်ကတော့ ကျွန်မကို တစ်စုံတစ်ရာဖြေရှင်းချက်မပေးဘဲ မျက်လုံးဝိုင်းလေးတွေနှင့် ငေးစိုက်ကြည့်နေပြီး…

    “ ဘာဖြစ်လို့ မောင့်အပေါ်မှာ သံသယတွေဝင်နေရတာလဲ ဖြူရယ် ။ မောင် ခြေလှမ်းတွေ ပျက်နေတာ မဟုတ်ပါဘူး ။

      မောင်က ဖြူ့တစ်ယောက်တည်းကိုပဲ ချစ်တာပါ ။”

မောင့်အဖြေကို ကျွန်မ ခနဲ့တဲ့တဲ့ပြုံးလိုက်ရင်း ခေါင်းကိုလည်း ခါယမ်းပစ်လိုက်သည် ။

    “ မောင် ဒီလိုဖြေလိုက်တာနဲ့ ဖြူက ယုံရမှာလား ။ မောင် အဲ့ဒီအိမ်ကြီးထဲကို ဘာလို့ ဝင်သွားရတာလဲ ။ ဘာလုပ်ဖို့

       သွားတာလဲ …ဟင်…ဖြေလေ မောင် ။”

မောင်ထံမှ စကားသံထွက်မလာ ။ တစ်စုံတစ်ရာ ဖြေဆိုခြင်းမရှိဘဲ ကျွန်မကို ညိုရီရီမျက်ဝန်းတွေနှင့် ငေးကြောင်ကြည့်နေသည် ။ မောင့်မျက်ဝန်းတွေက ကျွန်မအတွက် အဖြေရှာရခက်သည့်-ပုစ္ဆာတစ်ပုဒ်လို … ။

     “ မောင် တောင်းပန်ပါတယ် ဖြူ…။”

     “ ဘာသဘောလဲ ။ မောင်က ဘာတွေလုပ်ထားလို့ တောင်းပန်ရတာလဲ ။ ပြောလေ မောင် ။”

     “ ဟို…မောင့်ကို ခွင့်လွှတ်ပါ ။ မောင် တောင်းပန်ပါတယ် ဖြူရယ် ။”

     “ မတောင်းပန်နဲ့ မောင် ။ မတောင်းပန်ပါနဲ့တော့…။ မောင် တောင်းပန်တာကို ဖြူ မုန်းတယ် ။ တောင်းပန်လိုက်တာနဲ့

       ကိစ္စအားလုံး ပြီးသွားမယ်လို့များ မောင် ထင်နေသလား ။ မရဘူး မောင် ။ ဒီနေ့တော့ ဖြူ့ကို မောင် အမှန်အတိုင်း

       ပြောပြရမယ် ။ မပြောမချင်း မောင့်ကို ဖြူ ခွင့်လွှတ်မှာ မဟုတ်ဘူး ။”

ထိုနေ့က မောင်နှင့်ကျွန်မကြား အခြေအနေတွေ ဆိုးဆိုးရွားရွားတင်းမာခဲ့သည် ။ မောင်က ဘာစကားမှ မဆိုဘဲ ငေးငိုင်၍သာ နေသည် ။

- ကျွန်မ မောင့်ကို အဆက်ဖြတ်ပစ်လိုက်ရမလား…

အို…မောင့်မှာ ဘာအပြစ်ရှိလို့လဲ ။ ဘာကိုမှ ရေရေရာရာ မသိရသေးဘဲ အဆက်မဖြတ်သင့်ပါဘူး…ဟု ကိုယ့်ကိုယ်ကို ဆင်ခြေ ပေးနေမိ၏ ။

     “ မောင်…ဖြူ ပြန်နှင့်မယ် ။”

နောက်ဆုံးတော့ ကျွန်မဘက်ကပဲ တပ်ဆုတ်ခဲ့ရပြီ ။ မျက်ရည်များနှင့် နှုတ်ဆက်စကားဆိုကာ အရင် ထပြန်ခဲ့လိုက်သည် ။ မောင် ကတော့ ကျွန်မ-ကျောပြင်ကို ငေးကြည့်ရင်း တစ်ယောက်တည်း ကျန်ရစ်ခဲ့လေသည် ။

YYY

မောင်က ကျွန်မ ထင်ထားသည့်အတိုင်း ဆံပင်ကောက်ကောက်-ကောင်မလေးတစ်ယောက်ကို ပုခုံးဖက်ကာ ကန်ဘောင် နံဘေး-ထိုင်ခုံလေးတွင် နှစ်ယောက်အတူ ပူးကပ်ထိုင်လျက်ရှိသည် ။ သူတို့အတွဲကို အဝေးမှ လှမ်းကြည့်ရင်း ဒေါသစိတ်ကြောင့် ကျွန်မမှာ အသားများပင် တဆတ်ဆတ် တုန်ရီလာမိသည် ။

မောင်က ကျွန်မ ကွယ်ရာမှာ နောက်တစ်ယောက်နှင့် ဖောက်ပြားနေချေပြီ ။ တစ်ချိန်က ချစ်လှပါချည်ရဲ့ဟု တဖွဖွဆိုခဲ့ သော မောင့်နှုတ်ခမ်းများက ယခု ထိုနှင်းဆီဖူးသဏ္ဌာန်-နှုတ်ခမ်းပိုင်ရှင်မလေးဆီသို့ ချည်းကပ်သွားချိန်တွင်တော့ ကျွန်မ၏ ဒေါသ တို့ အုံကြွပေါက်ကွဲသွားခဲ့သည် ။

မောင်တို့နှစ်ယောက်အနား ပြေးဝင်သွားပြီး ထိုင်ခုံနောက်မှနေ မောင့်ပုခုံးကို ခပ်တင်းတင်းဆုပ်ကိုင်လိုက်ရင်း ကျွန်မရှိရာ ဘက်သို့ ဆွဲလှည့်ပစ်လိုက်သည့်အခါ…

   “ အမလေး…”

ကျွန်မ အာခေါင်ခြစ်ဟစ်အော်ကာ လန့်နိုးလာခဲ့ရပါပြီ ။

ထိုင်ခုံတွင် လဲလျောင်းနေရာမှ ဆတ်ခနဲထထိုင်လိုက်ရင်း ကတုန်ကယင်အမူအရာဖြင့် ရင်ဘတ်ဆီမှ အမွှေးပွရုပ်လေးကို တင်းတင်းကြပ်ကြပ်ပွေ့ပိုက်ထားလိုက်မိ၏ ။ ရင်အစုံက တဒုန်းဒုန်းခုန်မြန်လျက် ခြေဖျားလက်ဖျားတို့ အေးစက်နေဆဲ ။

အတန်ငယ်အကြောက်ပြေမှ စားပွဲပေါ်ရှိ ရေကရားအိုးထဲက-ရေကို ဖန်ခွက်ထဲသို့ လောင်းထည့်ပြီး တစ်ကျိုက်တည်း မော့သောက်လိုက်သည် ။ အပြင်ဘက်ဆီသို့ ငေးကြည့်လိုက်တော့ ညနေစောင်းနေဝန်းနီက ခြံနောက် - သရက်ပင်ထိပ်တွင် မေးတင်နေပြီ ။

သြော်…မောင်နှင့် ရန်ဖြစ်ပြီး စိတ်ညစ်ညစ်ဖြင့် အိမ်ပြန်ရောက်လာခိုက် ဆိုဖာပေါ်တွင် အိပ်ပျော်သွားခဲ့စဉ် မောင့်အပေါ် စိတ်စွဲကာ ထိုအိပ်မက်ဆိုးကြီးကို မြင်မက်ခဲ့ခြင်းဖြစ်မည် ။ မောင် နေမှ ကောင်းရဲ့လား…။

အိပ်မက်ထဲတွင် မြင်တွေ့လိုက်ရသော မောင့်မျက်နှာက အသားစိုင်အသားခဲတို့ ပြည့်ပြည့်ဖောင်းဖောင်း မရှိတော့ဘဲ အရိုးခေါင်းကြီးကဲ့သို့ မျက်တွင်းဟောက်ပက်၊ နှာခေါင်းရိုး ၊ ပါးစပ်အတွင်းမှ သွားနှင့်အရိုးများကို အတိုင်းသား တွေ့မြင်လိုက်ရ သဖြင့် ထိတ်လန့်ကြောက်ရွံ့ကာ ကျွန်မ အော်ဟစ်လန့်နိုးလာခြင်းပါ ။

ရုတ်တရက် တရားသဘောကို တွေးတောကြံဆမိ၍ ကျွန်မ သက်ပြင်းမျှင်မျှင်ချလိုက်သည် ။ အပေါ်ယံ အရေပြားတစ် ထောက်၏အလှတို့ ဖယ်ကြဉ်ကွာကျသွားသည့်အခါ သတ္တဝါအားလုံး အရိုးစုချည်းပါလားဟူသောသဘောကို ကျွန်မ ဆင်ခြင်လိုက် နိုင်၍ ကြောက်ရွံ့စိတ် လျော့ပါးသွားခဲ့သည် ။ သိုပေမယ့် အိပ်မက်မကောင်းလှသဖြင့် မောင့်အတွက် စိုးရိမ်ပူပန်နေမိဆဲ ။

အရာရာအားလုံး ကျွန်မအမှား ။ အချစ်ဆိုတာ ချစ်ဆိပ်သင့်သူအတွက်တော့ ခံရခက်စေသည့် ဆူးတစ်လက် အဆိပ် တစ်ခွက်ပါပဲ ။

အိပ်မက်ကြောင့် မောင့်အပေါ် စိုးရိမ်ပူပန်စိတ်ဝင်ကာ မောင်ရှိရာရပ်ကွက်ဆီသို့ ကျွန်မ ထွက်လာခဲ့မိသည် ။ မောင်နှင့် ကျွန်မ ချစ်သူတွေဖြစ်နေသည်ကို မောင့်မိဘများလည်း သိကြပြီးဖြစ်သည် ။ ထို့ကြောင့် ကျွန်မကို မောင့်အိမ်သို့ ၀င်ထွက်ခွင့်ပြု ထားပေမယ့် ကျွန်မက မိန်းမသိက္ခာကျမည်စိုး၍ အလှူအတန်းပြုသည့်အခါမျိုးမှလွဲ၍ လပ်လျားလပ်လျား မသွားတတ် ။ ယခု တော့ အိပ်မက်မကောင်းသောကြောင့် မောင် နေထိုင်ကောင်း/မကောင်း သွားမေးမှဖြစ်တော့မည် ။ နေလယ်ကတည်းက မောင့် မျက်နှာ ဖျော့တော့တော့နွမ်းလျလျ ဖြစ်နေသည် မဟုတ်လား ။

ကျွန်မ ကားကို ခပ်ဖြည်းဖြည်းမောင်းနှင်ရင်း မောင်တို့ရပ်ကွက်-လမ်းကြားလေးထဲသို့ ချိုးကွေ့လိုက်သည် ။ နေမင်းက အနောက်နိုင်ငံများဆီ ခရီးဆက်ရန် တာစူနေပြီ ။ ရုတ်တရက် ကျွန်မအကြည့်တွေက အိမ်အိုကြီးဆီသို့ အမှတ်တမဲ့ ရောက်ရှိသွား မိသည် ။

   “ ဟာ…”

ကျွန်မ ဘရိတ်ကို ဖြည်းဖြည်းနင်းရင်း လမ်းဘေးသစ်ပင်အောက်တွင် ကားကို ထိုးရပ်ပစ်လိုက်သည် ။ ကျွန်မ၏အကြည့်တွေက တော့ ထိုအိမ်အိုကြီးမှ မခွာသေး…။

       အိမ်အိုကြီး၏ရှေ့မျက်နှာစာတွင် မောင်နှင့်မိန်းမတစ်ယောက် အတူတူယှဉ်တွဲထိုင်လျက် စကားပြောနေကြသည် ။ ကျွန်မ မောင့်အိမ်ကို သွားဖို့ လိုတော့မည် မထင် ။ အလုံးစုံကို မျက်စိဖြင့် တပ်အပ်မြင်ခဲ့ပြီမို့ သဘောပေါက်ဖို့သင့်ပြီလေ ။ မောင့်မျက်နှာကို ကျွန်မ နောက်ဆုံးအနေဖြင့် တစ်ချက်စိုက်ကြည့်ပြီး ကားကို ပြန်လှည့် မောင်းထွက်လာခဲ့တော့သည် ။

   ဇန်နဝါရီ (၁၈) / (၁၉) ။

မွေးနေ့အပြီး တတိယနေ့နှင့်စတုတ္ထနေ့-နှစ်ရက်လုံး ကျွန်မ ဘယ်မှမသွားဘဲ အခန်းအောင်းနေခဲ့သည် ။ ရင်တစ်ခုလုံး ပုရွက်ဆိတ် တို့ စုပြုံကိုက်ခဲနေသကဲ့သို့ တဆစ်ဆစ်နာကျင်နေခဲ့ပေမယ့် ကျွန်မ မောင်နှင့်ဆုံတွေ့ရန် လုံးဝ မကြိုးစား ။ တစ်နေ့ညနေက ကိစ္စနှင့် ပတ်သက်ပြီး အခြေအတင်လည်း မဆွေးနွေးချင်တော့ပေ ။

မောင်ကလည်း ကျွန်မကို မဆက်သွယ်ပါဘူးလေ ။ ဟုတ်ပါတယ်…မောင့်အတွက် ငါက မလိုအပ်တော့ပါဘူး-ဟူသော အတွေးတို့ဖြင့် ကျွန်မနှလုံးသားကို ကျွန်မဘာသာ ထိုးဆွရင်း အိပ်ရာထက်မှာ တစ်ယောက်တည်း လူးလိမ့်ငိုကြွေးနေမိပြီပေါ့ ။

   “ သမီး မပြင်ရသေးဘူးလား…။ ဟင် ! မျက်နှာကြီးလည်း နီရဲလို့ ။ နေမကောင်းဘူးလား ။”

   “ ဟုတ်တယ် မေမေ ။ သမီး နေမကောင်းလို့ မလိုက်တော့ဘူး ။ မေမေတို့ပဲ သွားလိုက်တော့နော် ။”

   “ အို ! သမီးလေး နေမကောင်းဘူးလား ။ ဒါဆို ဆေးခန်းသွားမှပေါ့ ။”

   “ အာ…! အဲဒီလောက်လည်း မဟုတ်ပါဘူး မေမေရယ် ။ နည်းနည်းခေါင်းကိုက်ရုံပါ ။ သွားပါ…မေမေတို့ ဘုရား သွားမယ့်ကိစ္စ

     အပျက်မခံပါနဲ့ ။”

   “ ဖြစ်ပါ့မလားကွယ် ။ သမီး နေမကောင်းဘဲ တစ်ယောက်တည်းနေလို့ ဘယ်ဖြစ်မလဲ ။ ထားလိုက်ပါတော့ ။ သမီးအဖေပဲ

      သွားပါစေ ။ မေမေ မသွားတော့ပါဘူး ။”

   “ ဖြစ်ပါတယ် မေမေရယ် ။ သမီး ဆေးသောက်ထားပါတယ် ။ ရောဂါကြီးမှ မဟုတ်တာ ။ မေမေ့မွေးနေ့မှာ ဘုရားသွားဖို့ စီစဉ်

     ထားတဲ့ဟာကို မေမေ မပါလို့ ဘယ်ဖြစ်မလဲ ။ သွားပါ…သမီးတစ်ယောက်တည်း နေလို့ ဖြစ်ပါတယ် ။ ကလေးလေးလည်း

     မဟုတ်တော့ဘဲနဲ့ ။ သွားပါ ။ စောစော ပြန်ခဲ့ပေါ့ ။”

မေမေ့မွေးနေ့နှင့်ကျွန်မမွေးနေ့က (၄)ရက်သာခြားသည် ။ မေမေက သူမ၏မွေးနေ့တိုင်း ဘုရားသို့ မိသားစုလိုက် သွားဖူးနေကျဖြစ်ရာ ထိုနေ့တွင်လည်း ရွှေတိဂုံစေတီတော်သို့သွားရန် အားလုံးစီစဉ်ထားပြီသား ။ ကျွန်မကသာ မောင်နှင့် အဆင်မပြေဖြစ်ကာ ငိုယိုနေမိ၍ မလိုက်နိုင်အောင် ခေါင်းကိုက်နေသဖြင့် နေရစ်ခဲ့ရန် ဆုံးဖြတ်လိုက်သည် ။

မေမေက ကျွန်မကို တစ်ယောက်တည်းထားခဲ့ရန် စိတ်မချ ။ နေအိမ်က တိုက်ခန်းတွဲဖြစ်သောကြောင့် အရေးအကြောင်း ဆို တိုက်ခန်းချင်းကပ်လျက်မှ အိမ်နီးချင်းများကို အကူအညီတောင်းမည်ဖြစ်ကြောင်း ၊ အစီအစဉ်ကို အပျက်မခံဘဲ သွားပါရန် ကျွန်မ အတန်တန်ပြောမှ မိသားစုဝင်အားလုံး ကားတစ်စီးနှင့် ထွက်ခွာသွားကြသည် ။

မေမေတို့ထွက်သွားတော့ တစ်အိမ်လုံးတွင် ကျွန်မတစ်ယောက်တည်းသာ ကျန်ရစ်ခဲ့ရ၏ ။ တစ်ယောက်တည်း ဆိုပေမယ့် ကျွန်မတို့နေအိမ်က တတိယထပ်ဖြစ်၍ အပေါ်ထပ်/အောက်ထပ်/ဘေးခန်းများတွင် လူများ ရှိနေသည်မို့ ကျွန်မ-စိတ်ထဲ ကြောက်ရွံ့ မှု မဖြစ်မိ ။ ခေါင်းကလည်း အမှန်ပင် ငြီးစီစီနှင့်ကိုက်ခဲနေသည် ။

ကျွန်မ စိတ်အပြောင်းအလဲဖြစ်စေရန် စာရေးစားပွဲတွင် ၀င်ထိုင်ပြီး နယ်သို့ပြောင်းသွားသော-အခင်ဆုံးသူငယ်ချင်းဆီ စာရေးမည်ဟူသောအတွေးဖြင့် စာရွက်တစ်ရွက်ကို ဆွဲဖြုတ်လိုက်သည် ။

ဖြူလွလွစာရွက်သားပေါ်၌ သို့ / ခင်မင်ရသော သူငယ်ချင်းရေ…ဟူသည့် စာကြောင်းမှလွဲ၍ ဘာဆက်ရေးရမလဲဆိုတာ စဉ်းစားမရ ။ သူငယ်ချင်းကို မောင့်မကောင်းကြောင်း မပြောချင် ။ ကျွန်မကြောင့် မောင့်အပေါ်မှာ သူငယ်ချင်းတွေ အမုန်းမပွားစေ ချင်ပါ ။

      ဟိုအတွေးသည်အတွေးများဖြင့် မျက်ရည်ရစ်ဝဲလာပြန်သည် ။ ဘာရယ်ကြောင့်မှန်းမသိ…စားပွဲပေါ်ရှိ မောင့်ဓာတ်ပုံကို စိုက် ကြည့်နေရင်း ……

   “ မောင် တောင်းပန်ပါတယ် …ဖြူ ။”

ဆိုသည့်စကားသံကို ကျွန်မနားထဲမှာ ကြားယောင်လာမိသည် ။

   “ မတောင်းပန်ပါနဲ့ မောင် ။ မောင့်ရဲ့တောင်းပန်ပါတယ်ဆိုတဲ့စကားကို ဖြူ မုန်းတယ် ။ ဖြူတို့နှစ်ယောက်က သိပ်ချစ်ကြတဲ့

     ချစ်သူတွေ မဟုတ်ဘူးလား ။ မောင် ဖြူ့ကို ပွင့်ပွင့်လင်းလင်း ပြောပြသင့်တယ် ။ မောင်တောင်းပန်ရတဲ့ အကြောင်းရင်းမှန်

     ကိုပေါ့ ။”

ကျွန်မ အရူးတစ်ယောက်လို တစ်ကိုယ်တည်း ရေရွတ်ပြောဆိုရင်း အိပ်ရာပေါ်တွင် လှဲလျောင်းလိုက်သည် ။ ခေါင်းထဲက တဆစ် ဆစ်ကိုက်ခဲနေဆဲ…။ သည့်နောက်တော့ ကျွန်မ မှေးခနဲအိပ်ပျော်သွားပါရော ။

YYY

    “ ဖြူ…ထ……ထ ။ အောက်ထပ်မှာ မီးတွေ လောင်နေပြီ ။”

ကျွန်မ နှစ်နှစ်ခြိုက်ခြိုက်အိပ်ပျော်နေစဉ် ကျွန်မပုခုံးကို တစ်စုံတစ်ယောက်က လှုပ်ကိုင်နှိုးလိုက်သဖြင့် ကျွန်မ လန့်နိုးလာကာ ကယောင်ကတမ်း ထထိုင်လိုက်မိသည် ။

    “ ဟင်…! မောင်…မောင် ဘယ်လိုလုပ်ပြီး ဖြူ့အခန်းထဲကို ရောက်နေတာလဲ? ”

    “ မောင် နောက်မှ ရှင်းပြပါရစေနော် ။ အခု…ဖြူ အသက်အန္တရာယ်နဲ့ နီးနေပြီ ။ အရေးပေါ်ထွက်ပေါက်(တိုက်နောက်ဘက်

       ခြမ်းရှိလှေကား)ကနေ မြန်မြန်ဆင်းမှ ဖြစ်မယ် ။ လာ…လာလေ မြန်မြန် ။”

မောင်ဟာ အလွန်အနေအေးသူတစ်ယောက်ပါ ။ အမြဲလိုလို စကားကို အေးအေးသက်သာပြောဆိုတတ်သူ ။

မောင်နှင့်တွဲလာသည့် ချစ်သူ့သက်တမ်းတလျှောက်အတွင်း မောင်သည် ဘယ်သောအခါမှ အလောတကြီး မရှိခဲ့ ။ ယခုလို စကားတွေကို အလောတကြီးပြောပြီး စိုးရိမ်တုန်လှုပ်နေတာမျိုး ကျွန်မ တစ်ခါမျှ မမြင်ဖူးခဲ့ပေ ။ ကျွန်မအတွက် စိုးရိမ်ပူပန်နေသည့် မောင့်ကို ငေးကြည့်ရင်း ကျွန်မ ကျေနပ်သွားသည် ။ မောင့်အပေါ် စိတ်ဆိုးနေသမျှအားလုံး ချက်ချင်း ပြေပျောက်သွားပြီ ။

     “ မောင် ! တကယ်ပဲ ဖြူ တစ်ခုခုဖြစ်သွားမှာကို စိတ်ပူလို့လားဟင် ။”

     “ ဘာတွေမေးနေတာလဲ ကောင်မလေးရယ် ။ စိတ်ပူတာပေါ့ ။ မောင်က ဖြူ့အတွက်နဲ့ ဖြစ်တည်နေရတာပဲ မဟုတ်လား ။”

မောင်က ကျွန်မကို ဆွဲပြီး အိမ်နောက်ဘက်ဆီသို့ ခေါ်ဆောင်လာခဲ့သည် ။ ကျွန်မအိမ်၏တည်နေရာကို မောင် ဘယ်လိုလုပ်သိနေပါ လိမ့် ။ ကျွန်မကိုယ်တိုင်ကတော့ ဘာကိုမျှ ကောင်းကောင်း မမြင်တွေ့နိုင်…။ တစ်အိမ်လုံး မီးခိုးငွေ့တို့ဖြင့် မှောင်မိုက်မွန်းကျပ်လျက် ရှိပြီ ။

လှေကားဆီသို့ရောက်တော့ မောင်က ကျွန်မကို အရင်ဆင်းခိုင်းသည် ။  ကျွန်မမှာ အသက်ရှူကျပ်လွန်းလှသဖြင့် မူးဝေနေ ပြီ ။ ဘာကိုမျှ မတွေးတောနိုင်တော့ဘဲ မောင် ခိုင်းသည့်အတိုင်း လှေကားက ဆင်းလာလိုက်တော့ သံလှေကားပင် မီးဟပ်၍လား မသိ ၊ အတော့်ကို ပူခြစ်တောက်နေပြီ ။

ကျွန်မ ဘယ်လိုကဘယ်လို အောက်ကိုရောက်လာသလဲဆိုတာ မပြောတတ်တော့ပါ ။ အသိစိတ်တို့ ကင်းလွတ်နေကာ လူမှာလည်း ကတုန်ကယင် ။ တိုက်အောက်တွင် မီးသတ်ကားကြီးနှစ်စီးက ကျွန်မတို့အောက်ထပ်ခန်းကို မီးငြိမ်းသတ်လျက်ရှိ၏ ။

ပတ်ဝန်းကျင်ကို ဝေ့ဝဲကြည့်ရင်း ကျွန်မ လဲပြိုမလိုဖြစ်နေခဲ့ပြီ ။ ရင်တစ်ခုလုံး မွန်းကျပ်ဆို့နစ်နေသည် ။ မြေပြင်သို့အရောက် ခပ်လှမ်းလှမ်းလူအုပ်ကြီးထဲမှ ပြေးထွက်လာသော-မိဘနှစ်ပါးကို တွေ့မြင်လိုက်ရသည့်အချိန်တွင် ကျွန်မ လဲကျမေ့မြောသွားပါတော့ သည် ။

            နှစ်ရက်တိတိ ကျွန်မ သတိမေ့နေခဲ့သည် ။ သတိရလာတော့ ကျွန်မမွေးနေ့အပြီး ခုနစ်ရက်မြောက်နေ့ ၊ …

ဇန်နဝါရီ(၂၂)ရက်နေ့ ။ 

            ကျွန်မ ဆေးရုံကဆင်းဆင်းချင်း မောင့်အိမ်သို့ အပြေးလာခဲ့သည် ။ မောင်ဟာ ကျွန်မအပေါ်မှာ အကောင်းဆုံးသူ…ကျွန်မ အတွက် အရာရာအသင့်ရှိနေသူတစ်ယောက်မှန်း အခုတော့ ကျွန်မ နားလည်သွားပါပြီ ။ သို့ကြောင့်ပင်…ဆိုးခဲ့သမျှအမှားအားလုံးကို တောင်းပန်ရန် မောင့်ဆီကို ပြေးလာခဲ့လိုက်သည် ။ သို့သော်…မောင့်အိမ်တံခါးဝသို့အရောက် ကျွန်မ အံ့သြသွားခဲ့ရ၏ ။

            မောင့်အိမ်မှာ လူတွေ စည်ကားလျက် ။ မောင်တို့ အလှူ လုပ်ပြန်ပြီလား ။ ထိုစဉ် လူအုပ်ထဲမှ မောင့်မေမေ ပြေးထွက်လာ ပြီး ကျွန်မကို ကြိုသည် ။ အန်တီ့မျက်နှာတစ်ခုလုံး နီမြန်းရဲတွတ်လို့ ၊ မျက်ရည်စီးကြောင်းတို့က အတိုင်းသား ။

    “ သမီး…အန်တီ သမီးသတင်း ကြားတယ် ။ တိုက်ခန်း မီးလောင်လို့ ဆေးရုံတက်နေရတယ်ဆို ။”

    “ ဟုတ်တယ် အန်တီ ။ အန်တီကို မောင် ပြောပြတာလား ။ ကျွန်မ မောင့်ကို တောင်းပန်ဖို့ လာတာပါ ။ မောင်ရောဟင် ။

      ကျွန်မ…မောင်နဲ့ အရမ်းတွေ့ချင်တယ် ။ မောင် ဘယ်မှာလဲဟင် ။”

ကျွန်မစကားဆုံးတော့ မောင့်မေမေက မျက်ရည်တွေ တာကျိုးကျလာသလိုမျိုး ရှိုက်ကြီးတငင်ငိုချလိုက်သည် ။ မဆီမဆိုင်…ကျွန်မ ရင်ထဲ မီးကျွမ်းသင့်သလို ပူခနဲ ။

ဘာတွေဖြစ်နေတာလဲ ။ ဘုရား ဘုရား…ကျွန်မကို လာကယ်ရင်း မောင်များ တစ်ခုခုဖြစ်သွားခဲ့သလား ။ အားလုံးကလည်း ကျွန်မကို အထူးအဆန်းသတ္တ၀ါတစ်ကောင်လို ၀ိုင်းကြည့်နေကြသည် ။

YYY

      ကျွန်မ မကြောက်မရွံ့ပင် အိမ်အိုကြီးအတွင်းသို့ ၀င်လာခဲ့လိုက်သည် ။ အချိန်က ညနေ-နေ၀င်ရီတရော ။ ဒီအိမ်ကြီးက သရဲခြောက်တယ်တဲ့လေ ။

   “ သရဲတော့ ကြောက်တယ် မောင် ။ ဒါပေမယ့် မောင့်ကိုတော့ ဖြူ မကြောက်ပါဘူး ။ မောင့်ကိုသာ တွေ့ရမယ်ဆိုရင် မောင်ဟာ

     ဘယ်လိုရုပ်ရည်ပဲ ဖြစ်နေပါစေ … ဖြူ တွေ့ဝံ့ပါတယ် ။ ဖြူ့ကို ကိုယ်ထင်ပြပါနော်…နော်… မောင် ။”

ကျွန်မအတွေးထဲက ကျယ်ကျယ်လောင်လောင်ရေရွတ်ညည်းဆိုသံများကို မောင် ကြားမှကြားပါလေစ ။

အိမ်ကြီးက အမှန်ပဲ ဟောင်းနွမ်းပျက်စီးနေပြီ ။ အိမ်တံခါးများက ယိုင်နဲ့ပြိုပျက်လို့နေသည် ။ တံခါးမှန်တွေကလည်း ကွဲသည်ကကွဲ အက်သည်ကအက် ။ ကျွန်မ၏အကြည့်တွေက ဖုန်အလိမ်းလိမ်း တက်နေသော-ဧည့်ခန်းအလယ်မှ စားပွဲခုံလေး ဆီသို့ ရောက်ရှိသွားမိသည် ။ တစ်အိမ်လုံး ဖုန်တက်နေသော်ငြား စားပွဲဝိုင်းလေးကတော့ ပြောင်လက်ရှင်းသန့်နေသည့် ။ စားပွဲပေါ် မှာတော့ အဖြူရောင် Diary စာအုပ်ငယ်တစ်အုပ် ။

15.1.2011 ( ဖြူ့မွေးနေ့ )

ဒီနေ့လေးဟာ မောင် တန်ဖိုးအထားဆုံးနေ့လေးပါ ။ ဒီနေ့လေးမှာပဲ မထင်မှတ်ထားတာတွေဖြစ်ခဲ့တယ် ။ ဖြူ့ကို ဘယ်လိုရှင်းပြရပါ့ မလဲ ။ မောင် ပြောမထွက်ခဲ့ဘူး ။ ဒီနေ့…ဖြူ့ဆီကိုအလာ လမ်းမှာ မောင့်ကို ကားတစ်စီး ၀င်တိုက်မိတယ် ။ လေဟာနယ်ထဲကို မြှောက်တက်သွားပြီး ပြန်အကျမှာ မောင့်ခေါင်းတစ်ခုလုံး ကွဲကြေသွားသလို နာနာကျင်ကျင်ခံစားလိုက်ရပြီးနောက် မောင် သတိ လစ်သွားတယ် ။ သတိရလာတော့ ဖြူ့အနားကို မောင် ရောက်နေပြီလေ ။ ဒါပေမယ့် … မောင်တို့စုံတွဲကို လူတွေ ၀ိုင်းကြည့်နေက တည်းက မောင် သိလိုက်ပြီ ။ မောင်ဟာ “မောင်” မဟုတ်တော့ဘူးဆိုတာကိုပေါ့ ။ ဖြူ…နားရှုပ်သွားလားဟင် ။ အမှန်တော့ ကားတိုက်ခံရကတည်းက မောင် သေဆုံးသွားခဲ့ပြီ ။ ဖြူ့အနားမှာ ရပ်နေတာက မောင့်ရဲ့ဝိညာဉ် ။ ဒါပေမယ့်…မောင် ဘယ်လိုပြော ပြရပါ့မလဲ ။ ဖြူ အရမ်း ခံစားရမယ်မှန်း သိလို့ မောင် ပြောမထွက်ခဲ့ဘူး ။ ဒါကြောင့်…မောင် တောင်းပန်ပါတယ်လို့ပဲ ပြောဖြစ်ခဲ့တာပါ ဖြူ ။

16.1.2011

ကိုယ့်ကိုယ်ကို သေဆုံးသွားပြီဆိုတာကို မောင် လက်မခံနိုင်သေးဘူး ။ မောင် အရမ်း ၀မ်းနည်းတုန်လှုပ်နေမိတယ် ဖြူရယ် ။ မောင်…အရာအားလုံးကို ဆုံးရှုံးသွားခဲ့ပြီလား ။ မောင် မစဉ်းစားချင်ဘူးကွာ ။ ဘာကြောင့်မှန်း မသိပေမယ့် မောင့်ကို မြင်တွေ့နိုင် တာဆိုလို့ ဖြူတစ်ယောက်ပဲ ရှိတယ် ။ မောင့်မိဘ/အပေါင်းအသင်းတွေအားလုံး မောင့်ကို မမြင်နိုင်ကြဘူး ။ မောင် အရမ်းဝမ်းနည်း တာပဲ ဖြူရယ် ။ သေလူဆိုတာ ဒါပဲပေါ့နော် ။ လူတွေကြားထဲမှာ သေနေရတာ ၊ လူတွေအားလုံးရဲ့ လျစ်လျူရှုမှုကို ခံနေရတာဟာ သေဆုံးခြင်းပဲလား ။ မစဉ်းစားချင်တော့ဘူးကွယ် ။ မောင် ဒီအကြောင်းတွေတွေးရင်း ငေးငေးငိုင်ငိုင်ဖြစ်နေလို့ ဖြူ မောင့်အပေါ်မှာ သံသယတွေဝင်ပြီး စိတ်မချဖြစ်မနေပါနဲ့နော် ။ မောင့်အချစ်က ဖြူ့တစ်ယောက်တည်းအတွက်ပါ ။

ဒီနေ့…မိန်းမတစ်ယောက် မောင့်ကို လာခေါ်တယ် ။ မောင့်အတွက် ကောင်းကင်ဘုံမှာ ဗိမ္မာန်ပေါက်နေပြီတဲ့ ။ မောင် မသွားနိုင်သေးဘူး ။ ဖြူနဲ့ပတ်သက်ပြီး မောင် တစ်ခု ခံစားနေရတယ် ။ အန္တရာယ်အငွေ့အသက်တစ်ခုပဲ ။ ဖြူ ဒီရက်ပိုင်း တစ်ခုခု ဖြစ်တော့မယ်ဆိုတာကို မောင် ကြိုသိနေတယ် ။ ဒါ့ကြောင့် ခုနစ်ရက်မြောက်တဲ့နေ့မှ လာခေါ်ဖို့ တောင်းပန်လိုက်ရတယ် ။ ဖြူ… မောင့်နောက်က လိုက်ချောင်းနေမှန်းသိလို့ မောင် အိမ်ပြန်တဲ့လမ်းကို ထွက်လျှောက်ခဲ့တာပါ ။ တကယ်တော့ မောင် အိမ်ထဲမှာ နေခွင့် မရှိတော့ဘူး ။ ဒီအိမ်ပျက်ကြီးမှာပဲ မောင် နေ,နေရတာ ။ ဖြူ့ရင်ထဲမှာ ဘယ်လိုခံစားနေရတယ်ဆိုတာ မောင် သိပါတယ် ။ ဒါပေမယ့် အခုချိန်မှာတော့ မောင် ရှင်းမပြနိုင်သေးဘူး ။ တောင်းပန်ပါတယ် ဖြူရယ် ။

17.1.2011

ဖြူ စိတ်ဆိုးပြီး ထွက်သွားတော့ မောင် တကယ်ဝမ်းနည်းရတယ် ။ ဒါပေမဲ့ ဖြူက မောင့်ကို အဲ့ဒီလောက်ချစ်မှန်း အရင်က မသိခဲ့ဘူး လေ ။ ညနေကျတော့ မောင့်ကို စိတ်ပူပြီး လိုက်လာတယ်ဆို ။ မောင့်အပေါ် ဖြူ ဒီလောက်ချစ်မှန်းသာသိရင် မောင့်ကိုယ်မောင် ဒီထက်ပိုပြီး တန်ဖိုးထားခဲ့မိမှာ ။ ကားလမ်းကိုလည်း သတိထားပြီး ကူးခဲ့ပါရဲ့ ။ ဘယ်ဟုတ်ပါ့မလဲလေ ။ သေချိန်တန်လို့ သေရတာပဲ မဟုတ်လား ။ ဖြူ…လှမ်းကြည့်နေမှန်း မောင် တကယ်မသိခဲ့ဘူး ။ မောင်နဲ့အတူ တွေ့လိုက်ရတဲ့အမျိုးသမီးက မောင့်ကို လာခေါ်နေ တဲ့သူပေါ့ ။ သူက ဖြူ့ကို ကိုယ်ထင်ပြလိုက်တယ်-တဲ့ ။ မောင့်အပေါ် အထင်လွဲပြီး ဖြူ စိတ်ဆင်းရဲနေတော့မှာပဲနော် ။ တောင်းပန်ပါ တယ်ဆိုတဲ့စကားကလွဲပြီး မောင် ဘာပြောရမလဲ ဖြူရယ် ။

18.1.2011

ဒီနေ့တစ်နေ့လုံး ဖြူ့တိုက်ခန်းရှေ့မှာ မောင် ရှိနေခဲ့တယ် ။ ဖြူ ငိုနေမှန်းသိတော့ မောင် ရှင်းပြချင်လိုက်တာ ။ ဒါပေမယ့် အဖြစ်မှန် ကို ဖြူ သိသွားရင် မောင် ဒီမှာ နေခွင့်မရှိတော့ဘူး ။ မောင် ထွက်သွားလို့မဖြစ်သေးဘူး ဖြူ ။ ဖြူနဲ့ ပတ်သက်ပြီး မောင် တစ်ခုခုကို ကြိုသိနေတယ် ။ ဘာမှန်းတော့ မသိပေမယ့် အဲဒီဘေးကနေ ဖြူ့ကို မောင် ကာကွယ်ပေးရဦးမယ် ။ မောင် ဖြူ့အိမ်ရှေ့က မခွာနိုင် ဘူး ။ မောင့်ရဲ့မသိစိတ်က ဖြူ တစ်ခုခုဖြစ်တော့မယ်ဆိုတာကို ခံစားမိနေတယ် ။ မောင့်စိတ်ထဲက ဖြူ့ကို အခါခါ တောင်းပန်နေမိ တယ် ။

19.1.2011

ဒီနေ့မှာ မောင် ခံစားမိတဲ့အတိုင်း တကယ်ဖြစ်လာခဲ့ပြီ ။ မောင် ဖြူ့တိုက်ခန့်ရှေ့မှာ ရပ်စောင့်ရင်း တောင်းပန်စကားတွေ အထပ်ထပ် ရေရွတ်နေခဲ့တာကို ဖြူသာ မောင်နဲ့စိတ်ချင်းဆက်နွယ်နေရင် ကြားမိလောက်မယ်ထင်ရဲ့ ။ ရုတ်တရက် အပူဓာတ်တစ်ခုကို မောင် ခံစားလိုက်မိတယ် ။ အောက်ထပ်ကတိုက်ခန်း မီးလောင်နေပြီ ။ ဟုတ်တယ် ။ မောင် ရိပ်မိတာနဲ့တပြိုင်နက် ဖြူ့ဆီကို ပြေးဝင်လာခဲ့ တယ် ။ ဖြူက အိပ်ရာထက်မှာ ခွေခွေလေး အိပ်မောကျလို့ ။ ဖြစ်နိုင်မယ်ဆိုရင် မောင် အကြာကြီးငေးကြည့်ချင်တာပါ ။ ဒါပေမယ့် မနှိုးလို့မဖြစ်ဘူးလေ ။ အန္တရာယ်က အရမ်းကို နီးကပ်နေပြီမို့ ဖြူ့ကိုလှုပ်နှိုးပြီး အရေးပေါ်ထွက်ပေါက်လှေကားဆီကို အရောက်ပို့ ပေးခဲ့တယ် ။ အောက်ကို ဖြူ ရောက်သွားတာ သေချာတော့မှပဲ အိမ်အိုကြီးဆီ မောင် ပြန်လာခဲ့တယ် ။

20.1.2011  &  21.1.2011

ဖြူ သတိလစ်နေလို့ မောင် တစ်ချိန်လုံး စောင့်နေခဲ့တယ် ။ ဖြူ သိလား…ဆေးရုံထဲမှာ မကျွတ်လွတ်သူတွေ အများကြီးပဲ  ။ တချို့က နေရာလဲချင်လို့ ဖြူ့ကို အနှောင့်အယှက်ပေးဖို့ ကြိုးစားသေးတယ် ။ ဒါပေမယ့် မောင်တောင် ကာကွယ်ပေးစရာ မလိုဘူး ။ ဖြူ့အနား မှာ အလင်းတန်းတွေဝိုင်းနေလို့ မကောင်းဆိုးရွားတွေ ကပ်လို့ မရဘူးလေ ။ ဖြူ့ကို သမ္မာဒေဝနတ်မြတ်နတ်ကောင်းတွေက စောင့် ရှောက်နေတယ်ထင်ရဲ့ ။

      တကယ်လို့…နောင်ဘဝမှာ မောင်သာ တမန်တော်နတ်သားတစ်ပါးဖြစ်ခဲ့ရင် ဖြူ့ကို အခုလိုပဲ စောင့်ရှောက်နေမှာ…ဖြူ ယုံနော် ။ မမြင်နိုင်ပေမယ့် ဖြူ့အနားမှာ မောင် အမြဲရှိနေမှာပါ ။ ဖြူ မငိုရဘူးနော်…မနက်ဖြန်ဆို မောင် သာဓုခေါ်ပြီး သွားတော့မယ် ။ ဖြူ ဒီကို လာမယ်မှန်းကြိုသိလို့ မောင် ဒီစာအုပ်လေးကို ထားရစ်ခဲ့တယ် ။ ဒါတွေဖတ်ပြီး မောင့်တောင်းပန်စကားတွေအပေါ် ဖြူ မမုန်း လောက်တော့ပါဘူးနော် ။ နှုတ်ဆက်ခဲ့ပါတယ် ဖြူ ။

; ; ; ; ; ; ;

ကောင်လေး ဆုံးသွားတာ တစ်နှစ်လောက်ရှိပြီ ။ နို့ပေမယ့်……ခုထက်ထိ ကောင်လေးက သူ့အနားမှာ ရှိနေတုန်းပဲ…တဲ့ ။ အခု…သူကိုင်ထားတဲ့-စာအုပ်အဖြူလေးကို ထောင်ထောင်ပြီး ပြောပြတတ်တယ် ။ တစ်ခါတလေ ဖတ်တောင် ပြလိုက်သေး ။

ဒါပေမယ့် သူကသာ ဖတ်ပြနေတာ…အစ်မတို့ လှမ်းချောင်းကြည့်လိုက်ရင် စာရွက်က ဗြောင် ။ သူ ဖတ်ပြတာတော့ အစဉ်ကို ချောလို့…မသိတဲ့သူဆို မျက်ရည်တွေကျပြီး ငိုတောင် သွားရမယ် ။ ခက်တာက စာရွက်တွေက ဗြောင်စာရွက်တွေလေ ။ ဘယ်လိုလုပ် ယုံနိုင်မှာလဲ ။

အဲ…တစ်ပတ်တစ်ခါ ပန်းခြံထဲမှာ တစ်ယောက်တည်း စကားတွေ ပြောနေတတ်တယ် ။ ရပ်ကွက်ထဲက တိုးတိုးတိုးတိုးနဲ့ အရူးမလို့ ပြောပြန်တော့ သူ့မိဘတွေက မကြိုက်ကြဘူး ။ သူကတော့ ဘယ်သူ့ကိုမှ ဂရုမစိုက်ပါဘူး ။ သူ့ဇာတ်လမ်းကို ပြောတဲ့အခါ ပြော ၊ မဟုတ်ရင်လည်း ပန်းခြံထဲမှာ တစ်ယောက်တည်း စကားပြောရင် ပြောနေတတ်တယ် ။

သူ့ကို အရူးလို့ပြောကြပေမယ့် သူ ရူးတာက တစ်မျိုး ။ တခြားအရူးတွေလို သွက်သွက်ခါနေတာလည်း မဟုတ်သလို သီချင်းလေးတအေးအေးနဲ့ ကြောင်တောင်တောင်ဖြစ်နေတဲ့-အရူးမျိုးလည်း မဟုတ်ဘူး ။

တစ်ခါတလေ ပေါက်ကရလေးဆယ် ပြောတတ်တာကလွဲရင် ၊ တစ်ယောက်တည်း စကားပြောနေတတ်တာကလွဲရင် ကျန် တာက ပုံမှန်အတိုင်းပဲ ။ မသိရင် လူကောင်းပဲတော့ ။ ဘုရားသွား/ကျောင်းတက်လည်း လုပ် ၊ ဥပုသ်လည်း စောင့်မှစောင့် ။ ဘာဖြစ် လို့ ဒါတွေလုပ်နေရတာလဲလို့မေးလိုက်ရင်တော့ …

မောင်က သူနဲ့အတူနေချင်ရင် ဘုရား/တရားများများ လုပ်ရမယ်၊ သူတပါးအပေါ် စိတ်ကောင်းထားရမယ် ၊ ငါးပါးသီလ လုံခြုံရမယ်နဲ့ မတန်မရာတွေ ဖြေတော့တာပဲ ။  သူ့မိဘတွေကို ဆွေမျိုးတွေက ကောင်မလေးကို စိတ်ရောဂါကုဆရာဝန်နဲ့ပြဖို့ ပြော ကြသေးတယ် ။ အဘိုးကြီးနဲ့အဘွားကြီးကတော့ သူတို့သမီး မရူးပါဘူးဆိုပြီး ပေငြင်းနေပါလေရော ။ မပြောတတ်ပါဘူးလေ ။

ကောင်မလေးက ချောချောလေးရယ်၊ သနားပါတယ် ။ ဒါပေမယ့် သူက ရူးသွားမှ စိတ်ထား ပိုကောင်းလာတယ် ပြောရ မယ် ။ အရင်ကဆို သိပ်မောက်မာတာ … ဆိုးမှဆိုး…။ ခုဆို သူ ဒေါသထွက်တာတောင် မမြင်ဖူးတော့ဘူး ။

အဲ…သူ့စိတ်ကောင်းဝင်နေတယ်ထင်လို့ မေးကြည့်ပြန်တော့ ထထဖောက်လာရော ။ မောင်က သူနဲ့အတူနေချင်ရင် စိတ်ကောင်းထားရမယ် ။ လူတွေကို ကူညီရမယ် ။ အမျက်နည်းရမယ်ဆိုပြီး တမောင်မောင်နဲ့ ကြီးကြီးကျယ်ကျယ်တွေ ပြန်ဖြေတယ် လေ ။ နားကြားပြင်းကပ်ပေသိ အရူးနဲ့ ဖက်ဖြစ်လို့တော့ မတော်ဘူးပေါ့နော် ။

အဲတော်…သွားမှပါ ။ ညီမက လူသစ်မို့ ပြောပြနေတာနဲ့ အချိန်တောင် လင့်ကုန်ပြီ ။ အစ်မ ပဲပြုတ်ရောင်းလိုက်ဦးမယ် ။ ညီမ သိချင်တာရှိရင် အစ်မကို မေးနော် ။ ပဲပြုတ်လည်း နေ့တိုင်း အားပေးဦး…။

            ဟော…ဟိုမှာ ။ ပြန်လာပြီ…တွေ့လား ။

အဲဒါ ဘုန်းကြီးကျောင်းမှာ ဆွမ်းပို့ပြီး ပြန်လာတာပေါ့ ။

သူ့လက်ထဲက စာအုပ်အဖြူလေးကိုတော့ ဘယ်သွားသွား မချဘူး ။ အဲ…အဲ…သွားမယ်နော်…ညီမ ။

                                                                                                  စေတနာရှေ့ထားလျက်

                                                                                      ဂါဦးနွန်းကို


https://www.facebook.com/writer.GONKတွင် ဝင်ရောက်လေ့လာနိုင်ပါသည် ။

- စာချစ်ဆွေတွေအတွက် ဆရာမဂါဦးနွန်းကိုရဲ့စာပေမှတ်တိုင်တွေကို တစ်နေရာတည်းမှာ စုစည်းဖော်ပြပေးလိုတဲ့ စေတနာ ။

- စာချစ်သူချင်း နှစ်သက်ရာစာကို မျှဝေခြင်းဖြင့် ကုသိုလ်ယူပါ ။

- စာပေကို ချစ်မြတ်နိုးပေးတဲ့အတွက် ကျေးဇူးတင်ပါတယ် ။